UONGOZI HAPEWI DHALIMU

Allah (s.w) anasema Qur’an tukufu (2:124) kuwa, Na (kumbukeni) Ibrahim alipojaribiwa na Mola wake kwa matamko, na akayatimiza. Akasema: Hakika mimi nitakufanya imam wa watu (Ibrahim) akasema: Je, na katika kizazi change (pia). Akasema (ndiyo, lakini) ahadi yangu haiwafikii madhalimu.

Hapa pana mambo matatu ya kuchunguzwa: (a) Matamko aliyojaribiwa Ibrahim na Mola wake (b) Mimi nitakufanya Imam wa watu (c) Ahadi yangu haiwafikii madhalimu.

a) Matamko aliyojaribiwa Ibrahim: Aliulizwa Imam Ja'afar As'sadiq (a.s) kuhusu Aya hii, akajibu: Ni yale yale maneno aliyoyasema Nabii Adam (a.s.) kumuomba Mola wake: Ee Mola! Ninakuomba kwa haki ya Muhammad na Ali na F'atima na Hasan na Husein (a.s.). Akaulizwa tena Imam Ja'afar As'sadiq (a.s) maana ya 'FA ATAMMA HUNNA" yaani: "Na akayatimiza" Akajibu: "Ameyatimiza kwa Imamul qaaim, Imam wa kumi na mbili katika Ahlul Bayt aliotuachia Mtume (s.a.w.)

Tazama:

Al'bur'han fyi tafsiril Qur'an    J.l   Uk. 147

Majmaul Bayani   J.l   Uk. 378

Tafsirus Saafy    J.l   Uk. 186

b) Mimi nitakufanya Imam wa watu: Ahadi ya Mwenyeezi Mungu, ambayo ndiyo Uimam anaopewa Ibrahim, ni: ''Al-Imamah''.

Taz: Tafsirul Qurtubi     J.2 Uk. 108

 Zaadul masir   J.l Uk. 140

c) Ahadi yangu haiwafikii madhalimu. Kiongozi atakaeshika nafasi baada ya Mtume ni lazima awe safi, kama Mwenyeezi Mungu anavyowasifu: "Na jueni ya kwamba Mtume wa Mwenyeezi Mungu yuko pamoja nanyi, lau yeye angewatiini katika mambo mengi lazima mngetaabika. Lakini Mwenyeezi Mungu ameipendezesha kwenu imani, na amezipamba nyoyo zenu, na amekufanyeni mchukie ukafiri na ufasiqi na uasi, hao ndio waliongoka" 49:7.

Msimamo ulioonyeshwa hivi karibuni na baadhi ya Waislamu wa Tanzania kuhusu haja ya kuwa na kiongozi muadilifu, ni ishara muafaka na qadhia hii.